Теміртауда террористік акт туралы жалған ақпарат берген азамат ұсталды, деп хабарлады ҚазАқпарат Қарағанды облыстық ІІД баспасөз қызметіне сілтеме жасап.

«18 ақпаннан 19-ына қараған түнде «112» нөміріне белгісіз ер адам хабарласып, 7-ықшамаудандағы 31-үйге жарылғыш зат қойылғанын айтады. Барлық жедел қызметтер айтылған жерге жетіп, үйден 17 адамды эвакуациялайды. Алайда Қарағанды облысы ІІД қызметкерлері үйді тексеріп, жарылғыш затты таппады», - делінген хабарламада.

Іздестіру шараларының нәтижесінде қаланың мас күйдегі 58 жастағы тұрғыны ұсталды. Оның жедел қызметке жалған ақпарат берген телефоны тексеруге жіберілді.

Осы факті бойынша ҚР ҚК 273-бабына сәйкес сотқа дейінгі тергеп-тексеру басталды.