Мемлекет басшысы құқық қорғау органдарының жұмысын түбегейлі өзгертуді ұсынды

8.jpg

Мемлекет басшысы Нұрсұлтан Назарбаев құқық қорғау органдарының жұмысын түбегейлі өзгертуді ұсынды. Осы орайда Президент ҚР Ішкі істер министрі Қалмұхамбет Қасымовтың аталған міндетті орындай алатынына сенімді, деп хабарлайды ҚазАқпарат тілшісі.

«Ішкі істер органдарының қызметкерлері күнде қылмыспен күресіп отырады. Ал кей кезде халықты қорғаймын деп, өз өмірлерін де қауіпке тігеді. Тәуелсіздік жылдары осы жолда 770 полицей қаза тапты. Біз болсақ, қит етсе, оларды жамандаймыз. Ал қауіпті жағдайда полицияға жүгіреміз. Дегенмен, халық құқық қорғау органдарының түбегейлі өзгеруін күтіп отыр. Полиция жазалау таяқшасы емес, адамның көмекшісі болуы шарт», - деді Н. Назарбаев  Жолдауды жариялау барысында.

Осы орайда Президент ҚР Ішкі істер министрі Қалмұхамбет Қасымовты кәсіби полицей ретінде сыйлайтынын жеткізді. «Мен генерал Қасымовты ең кәсіби полицей, адал әрі тәуір адам деп санаймын. Сондықтан полицияны қалай өзгертетінімізді өзі ұсына алады. Ішкі істер органдарын жаңғырту бойынша арнайы Жол картасын қабылдау керек. Оны келесі жылы бастауымыз қажет», - деп атап көрсетті Н.Назарбаев.

Айта кетейік, алдағы уақытта полицейлердің жалақысы көтеріледі. Бұдан бөлек, құқық қорғаушыларды даярлау 5 жылдан 6 айға қысқаруы мүмкін.


Ұқсас тақырыптар