Төтенше жағдайлар қызметкерлері арнайы техникамен толық қамтамасыз етілуі шарт. Еліміздің аумағы үлкен, халық саны аз. Сәйкесінше ұланғайыр атырапты түрлі табиғи апаттан, қызыл жалын мен тасқын судан қорғап, тиісті әрекеттерді іске асыру үшін Төтенше жағдайға қарсы әрекет етуші қызметкерлерде арнайы техниканың барлық түрі болуы міндетті. Төтенше жағдай қызметтерінің барлығы дерлік техникамен толық қамтамасыз етілмеген. Мемлекет төтенше жағдайлар қызметкерлерін заманауи техникамен қамтамасыз ету саясатын іске асыруда. Кей бөлімшелерде әлі де ескі техника, кеңестік көліктер бар. Техникалық паркты жаңарту міндеті сол үшін де жылдам арады іске асуда.

 

Төтенше жағдайлар министрлігінің техникалық ерекшелігіне сәйкес радиациялық, химиялық және биологиялық қауіптерді залалсыздандыру үшін арнайы техникалар алынуда. Төтенше жағдайлар министрлігінің радиациялық, химиялық және биологиялық барлау жұмыстарына арналған арнайы автокөліктерінің негізгі паркі кеңестік дәуірде шығарылған, әбден ескеріп, тозған көліктер саналады. Оларды дереу арада жаңартып, жаңа типтегі арнайы техникаға алмастыру маңызды.

 

«Қазақстан Парамаунт Инжиниринг» ЖШС мемлекеттік қорғаныс тапсырысының аясында «Алан-2» көліктерін шығаруда. Бұл көліктер авариялық-құтқару машиналарының паркін толықтыратын болады. Бронды көлік әскери күштер мен Мемлекеттік күзет қызметкерлеріне де ұсынылуда.

 

Төтенше жағдайлар қызметкерлеріне арналған техниканы жаңарту үшін түрлі келісімдер жасалуда. Лизингтік қаржыландыру аясында 11 ұшақ пен 282 арнайы техника алу жоспарлануда. Қазіргі уақытта төрт дана L-410 NG ұшағын, төрт дана Ка-32А11ВС тікұшағын және үш дана Ми-8АМТ тікұшағын алу іске асуда. Арнайы келісімдер жасалуда.

 

10 түрлі 282 бірлік арнайы техниканы сатып алу үшін Қазақстан Республикасы Төтенше жағдайлар министрлігінің 20 аумақтық бөлімшелерімен сатып алулар жүргізілуде. Олар бойынша да арнайы келісімдер жасалуда. Бұл туралы Төтенше жағдайлар вице-министрі Кеген Тұрсынбаев 2024 жылдың қазан айында айтты.

 

Төтенше жағдайда қайғылы оқиғаның алдын алу үшін тұрғындарды жылдам арада хабарландыру, тиісті сәтте эвакуациялау маңызды. Сол мақсатты іске асыру үшін төтенше жағдайлар туралы халықты жедел хабардар ету үшін республика бойынша 3640 дабыл құрылғысы жұмыс істеп тұр. Аталған құрылғылардың 2092-сі сирена-дыбыс құрылғылары және 1548-і электр сиреналары саналады. Құрылғылар «Барлықтарыңыздың назарларыңызға!» деген хабарламаны таратып, төтенше жағдай туралы ақпаратты тұрғындарға жеткізеді және жасалуы тиіс әрекет жайлы айтады. SMS хабарламаларды да жаппай жіберу тәжірибесі қолданылуда. Бір мезетте азаматтарға хабарламаны жылдам жеткізу тетіктері де қарастырылуда.

 

«Darmen» жедел хабарлау мобильді қосымшасы да жасалды. Қосымша жылдам арада ақпарат таратады және қандай әрекет ету керектігі жайлы бағыт-бағдар береді. Жер сілкінісі, су тасқыны, өрт және басқа да табиғи апат сәтінде халықты жылдам хабарландырудың өзге де жолдары қарастырылуда. Шетелдік тәжірибелер де зерттелу үстінде.

Mezgil.kz