Әлемнің 30-дан аса елі Ресей мен Беларусь спортшыларын халықаралық жарыстардан шеттетуді қолдап отыр. Бұл туралы Ұлыбритания үкіметі хабарлады.

Мәлімдемеге АҚШ, Франция мен Ұлыбритания қол қойған. Құжатта бастамаға Ресейдің Украинаға жасаған шабуылы түрткі болғаны жазылған

«Ресей мен Беларусь спортшылары жарыстарға бейтарап статуспен қатысып жүргенімен, бәрібір оларды мемлекеттері қаржыландырады... Беларусь пен Ресей спортшылары халықаралық спорт қауымдастығына өз елдері бастаған соғыс аяқталған кезде ғана қосыла алады»,- делінген мәлімдемеде.

Украина президенті Владимир Зеленский биыл ақпанның басында Ресей спортшыларын Олимпиада ойындарынан шеттету керек десе, Литва, Латвия, Эстония мен Польша спорт министрлері де осыған ұқсас мәлімдемелер жасаған.

Халықаралық Олимпиада комитеті қаңтардың аяғында Украинадағы соғысқа ашық қарсы шыққан Ресей мен Беларусь спортшыларын халықаралық жарыстарға бейтарап ту астында қатыстыра беруді ұсынған.

Mezgil.kz