Бақы. Әлиев Әзербайжан Ұлттық жиналысында ант қабылдау рәсімінен кейін сөз сөйледі.

Оған тағы да сенім білдірген әзербайжан халқына алғыс білдіре отырып, Әлиев елдің жан-жақты дамуы және оның аумақтық тұтастығын қорғау үшін қолынан келгеннің бәрін жасайтынын мәлімдеді.

Әзербайжан президенті Илхам Әлиев елдің жаңа дәуірге бет алғанын атап өтті.

АРМЕНИЯ ЗАҢДАРЫН РЕТТЕМЕСЕ, БЕЙБІТ КЕЛІСІМ БОЛМАЙДЫ!

«Армения мен бұл елді әскери тұрғыдан қолдайтындар бізді ешнәрсе тоқтатпайтынын білулері тиіс. Егер аумақтық наразылықтар тоқтамаса, егер Армения өз заңдарын реттемесе, бейбіт келісім болмайды», - деді Әлиев.

Армениямен келіссөздер үдерісі, 2-ші Қарабақ соғысы және 2023 жылғы қыркүйекте жүргізілген терроризмге қарсы операция туралы айта келе, Әлиев: «Қазір жаңа дәуір басталды. Біз бұл кезеңге басымызды көтеріп кірісеміз. Біз алдымызға қойылған барлық міндеттерді орындадық, біздің мақсатымыз әрдайым күшті Әзербайжанды құру болды», - деді.

АРМЯН СЕПАРАТИСТЕРІНІҢ ТАБЫТЫНА ҚАҒЫЛҒАН СОҢҒЫ ШЕГЕ

Бір кездері сепаратистік армяндар «астана» етіп, оккупациялаған Ханкендіде президент сайлауында дауыс бергенін еске салып, Әлиев былай деді: «Ханкендідегі менің берген дауысым, мен жәшікке тастаған бюллетень жай ғана бюллетень емес. Бұл бюллетень армян сепаратистерінің табытының соңғы шегесі болды», - деді Әзербайжан президенті Әлиев.

Әлиев: «Әлем үшінші дүниежүзілік соғысқа өте жақын. Кейбіреулер бұл соғыс басталды деп есептейді. Осы қиын сәтте Әзербайжан армиясы өз күшін көрсетті», - деді Президент.

Президент жаңа кезеңде армия мен қорғаныс өнеркәсібін нығайтатынын айтты. Оның айтуынша, 2024 жылы қорғаныс өнеркәсібіне кемінде 1 миллиард манат салынады, бұл қару-жарақ өндірісін ұлғайтуға мүмкіндік береді.

Қарабақ мәселесі ұлттық мәселе болып табылатынын және бүкіл әзербайжан халқын біріктіретінін айтқан Әлиев: «Бұл мәселе шешілді. Біздің ұлттық бірлігіміз тұрақты болуы тиіс. Өйткені Әзербайжанның маңызы мен әлемдегі рөлі арта түсуде», - деді.

Қуатты жас ұрпақтың маңыздылығын атап өткен Әлиев: «Біз ұлттық және рухани құндылықтарды ұстанатын жастарды тәрбиелеуіміз керек. Мемлекет пен әрбір отбасының парызы - жастарымызды ұлттық рух пен дәстүрлі құндылықтар негізінде тәрбиелеу», - деп сөйледі.

Әлиев олардың азаматтық қоғамды нығайтатынын, Қарабақ пен Шығыс Зангезурді қалпына келтіру мен қайта құруды жалғастыратынын, экономиканы дамытатынын, кедейлікпен, жұмыссыздықпен күрес жөніндегі қызметті жалғастыратынын мәлімдеді.

ТҮРКІ ӘЛЕМІ - БІЗДІҢ ОТБАСЫМЫЗ!

Илхам Әлиев Әзербайжан бүгінгі күнге дейінгі тәуелсіз сыртқы саясат жүргізуді жалғастыра беретінін мәлімдеді.

«Ең алдымен, біз Түркі мемлекеттері ұйымы аясындағы жұмысымызды жалғастырамыз. Мен бұл біз үшін басымдық болып табылатынын нақты айтқым келеді. Түркі мемлекеттерінің ұйымы - біз үшін басты халықаралық ұйым, өйткені ол біздің отбасымыз. Бізде басқа отбасы жоқ. Түркі әлемі - біздің отбасымыз. Біз Түркі мемлекеттері ұйымы әлемдік аренадағы маңызды актерге және күш-қуат орталығына айналуы үшін бірлесе күш-жігер жұмсауға тиіспіз», - деді Президент.

Mezgil.kz