Қазақстанның Ішкі істер министрлігінің бұрынғы басшысы Ерлан Тұрғымбаевқа «қаңтар оқиғасына» байланысты қылмыстық іс қозғалды. Бұл ақпаратты ҚР Ішкі істер министрлігі де, ҚР Бас прокуратурасы да растады.

Сонымен Тұрғымбаевқа да тықыр таяды. Оған қандай айыптар тағылуда?

«Іс 1 361-бабы («Қызмет өкілеттігін теріс пайдалану») бойынша қозғалды», - деп хабарлайды БАҚ.

Қазақстанда «Қанды қаңтар» оқиғаларына байланысты тергеудің екінші толқыны басталды. Бұрынғы ішкі істер министрі Ерлан Тұрғымбаевтан басқа тергеу орбитасында Талдықорған полициясының бұрынғы бастығы Асқар Нұрсапа, Қарасай ауданының полициясының бұрынғы бастығы Болат Тотыбаев және басқалар бар. Тергеу басталғаннан кейін Тотыбаев Қазақстаннан қашып кеткені айтылады.

ҚР Бас прокуратурасы облыстар мен қалалардың барлық прокуратураларына 2022 жылдың қаңтар айында барлық облыстар, қалалар мен аудандар полициясының бастықтарынан жауап алу туралы бұйрық жіберді.

Алматы ҚП бұрынғы бастығы Қанат Таймерденов үкіметтік сайтта ІІМ экстремизмге қарсы іс-қимыл департаментінің бастығы ретінде көрсетілгенімен, іс жүзінде өз еркімен зейнетке шыққан.

Ерлан Тұрғымбаев 2019 жылғы ақпанда ҚР Ішкі істер министрі болып тағайындалды, ал 2022 жылғы ақпанда отставкаға жіберілді. Алайда генерал-лейтенант қызметсыз қалған жоқ. Министрліктен босатылғаннан кейін бірден Президенттің кеңесшісі болды. 2022 жылғы қыркүйекте ол Қазақстанның ШЫҰ Аймақтық терроризмге қарсы құрылымы жанындағы тұрақты өкілінің құрметті лауазымын алды.

ҚР Бас прокуратурасы БАҚ-қа ресми мәлімдеме жасап, Тұрғымбаевтың не үшін тергеліп жатқанын хабарлады.

БАС ПРОКУРАТУРА НЕ ДЕЙДІ?

«Бас прокуратура Ішкі істер экс-министрі Е. Тұрғымбаевты және полиция органдарының басқа да басшыларын қылмыстық қудалау туралы түрлі телеграм-арналарда таратылған ақпаратқа қатысты келесіні хабарлайды.     

2022 жылдың басынан бастап Бас прокуратура қаңтар оқиғалары кезеңінде құқықтық тәртіп пен қауіпсіздікті қамтамасыз етпеуге, сондай-ақ азаматтарға азаптауды қолдануға байланысты күш органдарының қызметкерлеріне қатысты тергеп-тексерулерді жалғастыруда. Оларды жасағаны үшін соттармен облыстық полиция және ұлттық қауіпсіздік органдарының бірқатар басшылары мен қызметкерлері сотталды.   

Жүргізіліп жатқан тергеп-тексерулер шеңберінде Ішкі істер экс-министрі Е.Тұрғымбаевтан жауап алынды.      

Сондай-ақ, Бас прокуратура Алматы облысы Қарасай ауданы Қошмамбет ауылында орналасқан арнайы қабылдау жағдайында ұсталған азаматтарға азаптауды қолдану туралы іс бойынша дәлелдемелер жинады. 2024 жылдың 16 наурызында осы қылмысты жасағаны үшін Қарасай ауданының арнайы қабылдау орыны және полиция басқармасының бұрынғы басшылары қамауға алынды. Бұдан басқа, қызметтік атыс қаруын ұрлау фактілері бойынша Талдықорған қаласы полиция басқармасының бұрынғы басшылығына қатысты тергеп-тексеру жалғасуда.      

Осы тергеп-тексерулер бойынша басқа да мәліметтер тергеп-тексерудің, сондай-ақ азаматтардың құқықтары мен заңды мүдделерін сақтай отырып, жұртшылыққа жеткізілетін болады», - делінген ресми хабарламада.

Mezgil.kz