Кеше, 17 ақпанда Ұлытау облысындағы Жаңаарқа ауданында орналасқан «Қазақмыс» компаниясына тиесілі «Жомарт» кенішінде тау жынысы опырылып түсіп, 7 жұмысшы үйінді астында қалып қойған. Бұл туралы «Қазақмыс» хабарлады.

(Сурет: adyrna.kz)

АПАТ ЖАЙЛЫ НЕ БЕЛГІЛІ?

Оқиға орнында жедел іздестіру-құтқару жұмыстары жүргізіліп, оған ТЖД-ның 21 қызметкері мен 7 техникасы, сондай-ақ құтқару жұмыстарына «Серіктес» АҚҚ-ның 2 бөлімшесі жұмылдырылған.

Бүгін таңда үйінді астында қалған 7 жұмысшының мәйіті табылғаны белгілі болды. Олардың денелері жер бетіне шығарылып, сот-медициналық сараптама жүргізу үшін полиция қызметкерлеріне тапсырылған. Бұл туралы төтенше жағдайлар министрлігінің баспасөз қызметі мәлімдеді.

Олардың жеке тұлғалары анықталуда. Қазіргі уақытта оқиғаның барлық мән-жайларын анықтау мақсатында тергеу жүргізілуде. ҚР ТЖМ жедел штабы ашқан «желіге» қазірге дейін 23 қоңырау түскен.

ПРЕЗИДЕНТ КӨҢІЛ АЙТТЫ

Президент Қасым-Жомарт Тоқаев «Қазақмыс» корпорациясының Ұлытау облысындағы кенішінде тау массасының құлауы салдарынан қаза болған жұмысшылардың туған-туыстары мен жақындарына көңіл айтты.

Мемлекет басшысы Үкіметке төтенше жағдайдың мән-жайын мұқият тексеру жөнінде міндет жүктеді. Салалық ведомстволар мен өңір әкімдігіне марқұмдардың отбасыларына барлық қажетті көмек көрсету туралы тапсырма берілді.

ҰЛЫТАУ ОБЛЫСЫ ӘКІМДІГІ НЕ ДЕЙДІ?

Ұлытау облысының әкімдігі кен орнында қаза тапқан жұмысшылардың отбасылары мен жақындарына психологиялық және әлеуметтік тұрғыдан қажетті қолдаудың барлығын көрсетеді.

Өңір басшысы Дастан Рыспеков: «Қайғылы оқиға баршамыздың жүрегімізге ауыр тиді. Бұл жағдай - бірнеше отбасы үшін орны толмайтын қаза. Қайтыс болған кеншілердің туған-туыстарына, жақындарына шын жүректен көңіл айтамын. Бұл қасірет баршамыз үшін оңайға соққан жоқ. Қаза тапқандардың отбасыларына қажетті көмек көрсету үшін барлық тиісті шара қабылданады», – деді.

ҮКІМЕТ АРНАЙЫ КОМИССИЯ ҚҰРДЫ

Премьер-министр Олжас Бектеновтің тапсырмасы бойынша Ұлытау облысы Жаңаарқа ауданындағы шахтаның опырылуы себептерін анықтау және зардап шеккендерге көмек көрсету жөніндегі арнайы комиссия құрылды.

Комиссияны Премьер-министрдің орынбасары Қанат Бозымбаев басқарды. Вице-премьерге мемлекеттік органдар мен ұйымдардың жұмысын үйлестіру үшін ТЖ орнына шұғыл бару тапсырылды.

«ҚАЗАҚМЫС» НЕ ДЕЙДІ?

«Қазақмыс» «Жомарт» кенішінде қаза болғандардың отбасыларына ұжымдық шартта көзделген барлық қажетті көмекті көрсетеді.

Әлеуметтік және материалдық қолдау көрсету, оның ішінде моральдық зиянды өтеу мақсатында қаза болғандардың отбасыларына қызметкердің орташа жылдық жалақысының 10 еселенген мөлшерінде, сондай-ақ жерлеуді ұйымдастыруға 2 миллион теңгеден төленеді.

Сондай-ақ асыраушысынан айырылу бойынша ай сайынғы төлемдер, балалардың оқуына ақы, қайтыс болған қызметкерлердің несиелері мен несиелерін өтеу және отбасы мүшелерінің өтініші бойынша басқа да көмек түрлері қарастырылған.

«Қазақмыс» басшылығы мен ұжымы қаза болғандардың туыстары мен жақындарына шын жүректен көңіл айтады», - делінген ресми хабарламада.

Mezgil.kz