Венесуэланың қазіргі тағдыры қыл үстінде. Мадуро билігі АҚШ қысымына шыдас беруге шамасы келмей, одақтастар мен әріптестерінен көмек сұраған. Алайда, Каракасқа қарайласатын бірде-бір ел табылмады...

(Сурет: oxu.az)

Бүгінгі күнде Николас Мадуро билігі бұрын-соңды болмаған қысымның астында тұр, ең қиыны —ұзақ жылдар бойы «қолдаймыз» деп келген «одақтастары» дәл қазір Мадуродан сырт айналып отыр. Олар – Ресей, Қытай, Иран...

МАДУРОҒА ЕШКІМ КӨМЕКТЕСПЕЙДІ...

Бұл мемлекеттер күн сайын, апта сайын Вашингтонды ашық сынап келгенімен, нақты іс-әрекетке келгенде бәрі үнсіз қалды. Бұл үнсіздік — геосаяси салмақтың қалай өзгергенін айқын көрсететін белгі.

АҚШ-пен жанжал ушығып тұрған шақта Венесуэла өзінің сүйенішсіз қалғанын көріп отыр. Ресей Украинадағы соғыстан бас көтере алмай жатыр. Қытай өз экономикасындағы дағдарыстармен арпалысуда. Куба, Иран, Никарагуа сияқты серіктестердің күш-қуаты шектеулі. Яғни Каракасқа шынайы қолдау көрсету түгілі, саяси тәуекелге баруға қауқары жоқ. Бұған қоса Мәскеу мен Бейжің АҚШ президенті Дональд Трамппен қарым-қатынасты жақсартуға мүдделі болғандықтан, Мадуро үшін саяси капиталын ысырап етпек емес. Осылайша, жылдар бойғы «сыртқы қорғанысқа» деген сенім қаңқасы ғана қалған күйге түсті.

Вашингтон болса, дәл осы әлсіздікті сезгендей, Кариб аймағындағы әскери қатысуын күшейтті. АҚШ есірткі трафигіне қарсы операция аясында 20-дан аса кемеге соққы беріп, ондаған адам қаза тапты. Бұл — Пентагонның қарапайым әскери қимылы емес, Венесуэлаға бағытталған нақты сигнал еді.

МАДУРОНЫҢ ЖАНТАЛАСЫ. ОПЕК АРАША БОЛА МА?

Ал Мадуро ОПЕК-ке жедел хат жолдап, АҚШ-ты «Венесуэланың әлемдегі ең үлкен мұнай қорын басып алмақшы» деп айыптады. Бұл мәлімдеме бір қарағанда сыртқы қауіптен сақтанудың амал-шарғысы секілді көрінгенімен, шындап келгенде Мадуроның билікті сақтап қалуға деген жанталасы іспетті.

Әскери қысыммен қатар саяси алаң да қыза түсті. CNN хабарлауынша, Мадуро АҚШ өкілдерімен бейресми сөйлесулер барысында 1,5 жылдан кейін билікті тапсыруға дайын екенін жеткізген. Яғни Мадуроның өзі де халықаралық қысымның шегіне жеткенін мойындап отыр. Мұны кейбір америкалық шенеуніктер қабылдауға дайын болғанымен, Ақ үй Мадуроның дереу кетуін талап етуде. Бұл — дипломатиялық ұсыныс емес, ашық ультиматум.

Тіпті әуе кеңістігі де саяси текетірестің жаңа майданына айналды. АҚШ Венесуэла маңын «ұшуға қауіпті аймақ» деп атағаннан кейін бірнеше ірі авиакомпания рейстерін тоқтатты. Бұған жауап ретінде Каракас алты әуе компаниясына қонуға тыйым салды. Ал Трамп «Венесуэланың әуе кеңістігін толықтай жабық» деп жариялады. Бұл сөз тек әлеуметтік желіде айтылған мәлімдеме ғана емес, соғыс жағдайындағыдай ескерту болды.

Бүгінде ең үлкен сұрақ — егер АҚШ әскери операция бастаса, Венесуэла өзін қалай қорғайды? Бұл сұрақтың жауабы бәріне белгілі: ешбір ел Мадуроның қасына келіп, оны қорғауға дайын емес. Геосаяси сахнада оның айналасындағылардың бәрі өз мүддесін ғана ойлап тұр. Ресей мен Қытай үшін Венесуэла енді басымдыққа ие бағыт емес. Вашингтонмен арадағы қатынас әлдеқайда маңызды.

Осының бәрі Венесуэланың тарихи сынақ алдында тұрғанын көрсетеді. Бір кездері әлемнің алыптары қолдайды деген сенімге арқа сүйеп келген Мадуро бүгін жалғыз қалды. Ал алпауыт державалардың ойынында жалғыз қалған лидердің тағдыры қандай болатынын тарих талай рет көрсеткен. Венесуэла үшін шешуші кезең басталды — бұл кезеңде әр қадам елдің ғана емес, аймақтың да келешегін айқындайды.

Mezgil.kz