Қай қоғамның болсын беріктігі мен болашағы ең алдымен отбасының жағдайына байланысты. Отбасы – ұлттың рухани құндылықтарын сақтайтын, жас ұрпақтың дүниетанымы мен мінез-құлқы қалыптасатын алғашқы орта. Сондықтан Қазақстанда отбасылық саясатты дамыту, неке институтын нығайту, ана мен баланы қорғау мемлекеттік саясаттың маңызды бағыттарының бірі болып қала береді.

(Сурет ЖИ арқылы жасалды)

 

Қазақстан Республикасының Конституциясы отбасының қоғамдағы ерекше орнын нақты айқындайды. Конституцияда «Неке мен отбасы, ана мен әке және бала мемлекеттің қорғауында болады» деп көрсетілген. Сонымен қатар ата-аналардың балаларын тәрбиелеу мен олардың денсаулығына қамқорлық жасау міндеті бекітілсе, кәмелетке толған әрі еңбекке қабілетті балалардың еңбекке жарамсыз ата-анасына қамқорлық жасау жауапкершілігі де заң жүзінде белгіленген. Бұл қағидалар отбасының тек жеке құндылық емес, мемлекеттің тұрақты дамуының негізі екенін көрсетеді.

 

Соңғы жылдары елімізде отбасыларды қолдау бағытындағы әлеуметтік саясат айтарлықтай күшейді. Бүгінде Қазақстанда 6,2 миллионнан астам отбасы өмір сүреді. Олардың әл-ауқатын арттыру мақсатында көпбалалы отбасыларға, жүкті әйелдерге, жаңа туған сәбиі бар аналарға және бала күтімімен отырған ата-аналарға мемлекеттік қолдаудың бірнеше түрі ұсынылады.

 

2025 жылы бала тууына байланысты біржолғы мемлекеттік жәрдемақының мөлшері бірінші, екінші және үшінші балаға 149 мың теңгеден астам, ал төртінші және одан кейінгі балаларға 247 мың теңгеден астам болып белгіленді. Сонымен қатар баланың бір жарым жасқа толуына дейін оның күтіміне байланысты ай сайынғы жәрдемақы төленеді.

 

Көпбалалы отбасыларды қолдау жүйесі де кезең-кезеңімен жетілдіріліп келеді. Қазіргі таңда төрт және одан көп баласы бар отбасыларға табысына қарамастан ай сайын мемлекеттік жәрдемақы төленеді. Бұл әлеуметтік қолдау демографиялық өсімді ынталандырумен қатар, балалардың сапалы өмір сүруіне жағдай жасауға бағытталған.

 

Ана мен баланың денсаулығын қорғау – мемлекеттік саясаттың басым бағыттарының бірі. Соңғы жылдары елімізде перинаталдық орталықтар жаңартылып, ана мен бала денсаулығын бақылау жүйесі цифрландырылды. Міндетті әлеуметтік медициналық сақтандыру аясында жүкті әйелдер мен балалардың басым бөлігі тегін медициналық қызметтермен қамтамасыз етіледі. Республика бойынша жүздеген емхана мен перинаталдық орталық ана мен бала денсаулығын сақтауға қызмет көрсетіп келеді.

 

Отбасылық құндылықтарды дәріптеу бағытында да жүйелі жұмыстар жүргізілуде. Республика көлемінде «Мерейлі отбасы» ұлттық байқауы өткізіліп, өнегелі әулеттер марапатталады. Бұл жоба қоғамда жауапкершілікті, өзара сыйластықты және ұрпақтар сабақтастығын насихаттайтын маңызды бастамаға айналды. Сонымен бірге Отбасын қолдау орталықтарының саны артып, олар психологиялық, құқықтық және әлеуметтік кеңес беру қызметтерін ұсынып келеді.

 

Қазіргі жаһандану дәуірінде материалдық қолдау ғана емес, рухани құндылықтардың да маңызы артып отыр. Өзара құрмет, жауапкершілік, еңбекқорлық, үлкенге ізет, кішіге қамқорлық сияқты ұлттық құндылықтар отбасының берік болуына негіз қалайды. Мемлекет осы құндылықтарды сақтауға құқықтық және әлеуметтік жағдай жасап отыр, алайда отбасының беріктігі ең алдымен оның мүшелерінің бірлігі мен өзара түсіністігіне байланысты.

 

Берік отбасы – қуатты қоғамның кепілі. Конституциямен қорғалған неке институты, ана мен баланы қолдау шаралары, әлеуметтік кепілдіктер мен ұлттық құндылықтарды дәріптеу жұмыстары Қазақстандағы отбасылық саясаттың басты басымдықтары болып қала береді.

Mezgil.kz