Алматыда 15 қарашаның түн ортасында 29 жасқа дейінгі жұмыс істейтін жастар үшін жалға берілетін тұрғын үй бағдарламасы бойынша өтінімдер қабылдау басталады. Өтінімдерді ағымдағы жылдың 20 қарашасында сағат 23.59-ға дейін беруге болады, деп хабарлайды Mezgil.kz Express Qazaqstan-ға сілтеме жасап.

Қала әкімдігінің сайтында жарияланған ақпаратқа сүйенсек, өтінімдерді қабылдау www.almaty-jastary.info.сайтында жүргізіледі, сайтқа кіру өтініш берушілердің электрондық-цифрлық кілттері бойынша жүзеге асырылады.

Бағдарламаға қатысушыларға қойылатын негізгі талаптар: жасы — 29 жасқа дейін, Алматыда соңғы екі жылдан кем емес тұрақты тіркелуі, соңғы екі жыл ішінде Қазақстан аумағында тұрғын үйінің болмауы. Бұдан басқа, соңғы 6 айда үміткерлердің ай сайынғы жалақысы 40 АЕК-тен жоғары болуы тиіс — 116 680 тг.

Қажетті құжаттардың, жиі қойылатын сұрақтардың тізбесі туралы толық ақпарат жоғарыда көрсетілген сайтта жарияланған.

Берілетін пәтерлер Наурызбай ауданындағы "Алма Сити-5" жаңа ТК және Алатау ауданындағы "Мәдениет" ТК орналасқан.

Жалпы саны — 1050 бір бөлмелі пәтер. Жалға беру мерзімі — ұзарту құқығынсыз 5 жыл.