Көпшіліктің сүйікті телехикаясына саналатын "Келінжан" енді толықметражды киноға айналды. 4 маусым бойынша көрермендердің назарын өзіне аудара білген "Келінжан" басқа хикаямен үлкен экранға шықты. Sulpak Cinema Kazakhstan компаниясының ұйымдастыруымен Алматыдағы Chaplin Cinemas кинотеатрында жабық көрсетілім ұйымдастырылды.

Телехикаяда абысындар арасында араздық болса да, бауырлар бір-бірімен тату болса, фильм оқиғасы мүлдем басқа. Ағайындар арасындағы түсініспеушілік пен абысындар арасындағы ақша үшін талас арасында өрбиді. Берекелі шаңырақтың ортасына үлкен қаржы сызат түсіреді. Отағасы Темірбектен қалған жер телімін кәсіпкер сатып алмақ болып қомақты қаражат ұсынады. Осыны естіген абысындар мен бауырлар жерге таласып қалады. Қомақты қаржыға үмітті үш жұп өзара бақталастыққа түсіп, әр түрлі күлкілі оқиғаларға тап болады. Ал даулы істің оңтайлы шешілуіне отанасы Күлімхан апа ат салысады. 

«Келінжан» комедиялық туынды экранға 24 қараша шығып, еліміздің барлық кинотеатрларда көрсетіле бастады.