Бүгін Ресей президенті Владимир Путин Украинаға өзі бастаған соғысқа бір жыл толуына орай федералды жиын өткізді. 

Сонымен Кремль қожайыны не деді, назар салайық:

– Ресейді соғыс даласында жеңу мүмкін емес. Сондықтан бізге қарсы ақпараттық шабуылдар жасалып жатыр. Көптеген жастар соның құрбанына айналуда;

– Батыс Ресейге стратегиялық соққы беру ойын жасырмайды. Бұл біз үшін ат құйрығын біржола үзісу дегенді білдіреді. Батыс жергілікті жанжалды әлемдік деңгейдегі қақтығысқа жеткізгісі келеді. Біздің бұған берер жауабымыз бар,-деді ол.

Путиннің ойынша, соғысты бастаған батыс, ал Ресей сол соғысты тоқтата алмай жатыр-мыс.

– Біз соғысты бастаған жоқпыз, біз соғысты бар күшімізбен тоқтатпақпыз. Ресей бейбітшілік үшін қолдан келгеннің бәрін істеді, Батыспен диалогқа келуге де дайын болды,-дейді ол.

Путиннің сөзінше батыста педофилия «қалыпты жағдайға айналған».

– Батыста не болып жатқанын қараңыздар. Педофилия қалыпты жайтқа айналған. Дінбасылары бір жынысты некені қиып жатыр. Батыстың нейтралды-гендерлі құдайы бар. Кешіре гөр, құдайым, олар өзінің не істеп не қойып жүргендерін білмейді. Біз балаларымызды ондай азғындықтан қорғауымыз керек. Солай істейміз де,-деді ол.

Путин ресейлік олигархтарды елге қайтуға шақырды.

– Кейбір кәсіпкерлер шетелден яхталар мен жылжымайтын мүлік сатып алды. Енді олар санкцияның астында қалды. Мен сіздерге ескерткенмін. Соттан сотқа жүгіріп, шаршайсыздар,-деді Ресей президенті.

Оның ойынша, батыс Ресейдің байларын тонаған.

– Шетел банктеріндегі қыруар қаржысынан, яхталары мен зәулім сарайларынан айырылғандарға қарапайым халықтың еш жаны ашыған жоқ,-дейді ол. 

Сондай-ақ Путин АҚШ-тың ядролық қаруды сынауға дайындалып жатқанын атап өтті. Қорғаныс министрлігі мен Росатомға да сынақтарға дайындалуды тапсырды.

Mezgil.kz