Әлгінде ғана ҚР Еңбек және халықты әлеуметтік қорғау министрлігіне шүйлігіп, вице-министрдің: «85 мың теңге халықтың өмір сүруіне жетеді», - деп сөйлегеніне қарсы уәж айтқан Мәжіліс депутаты Ринат Заитовтың жуырда әлеуметтік желіге және бір сұхбатынан үзінді жария болды.

(Сурет әлеуметтік желіден алынды)

Онда Мәжіліс депутаты: «Алаяқтықтардың 80 пайызын намаз оқитындар жасайды», - деген ауанда сөз айтады. Депутаттың осы айтқандары қоғамды ызу-қызу талқы болуда. Осыған қатысты Ринат Заитовтың өзі де пікір білдіріп, «ешкімнен кешірім сұрамайтынын», керісінше «өзіне қарсы шабуыл басталғанын» жазыпты.

Ринат Заитов:

«Кейінгі екі күнде маған қарай екпінді ақпараттық және психологиялық шабуыл басталды. Оны өзім де күткенмін. Себебі, оған етім үйренген. Мұндай шабуылдар маған 2008, 2011, 2019-ыншы жылдары да жасалған. Жасырмаймын, оңай емес. Бірақ шыдауға тура келеді. Енді сіздерге бұл технология қалай жасақталатынын түсіндіруге тырысайын. Мысалы, осы жолғы шабуылдың тақырыбы менің намаз оқып жүріп алаяқтық жасайтын адамдар жайлы айтқан сөзімді алға тартып, сол арқылы қоғамды маған қарсы қоймақ. Мақсаты белгілі. Біріншісі - мені қорқыту, екіншісі - менің жеке басыма қастандық жасалса, осы себептен екен дегізу. Сөз жоқ ақылды жүріс. Екеуінің біреуіне жеткенше олардың тоқтамайтынын да білемін. Тәуекел. Маңдайға жазғанын көреміз... Бәріне бірдей бір ғана жауабым бар.

Қадірлі ағайын, мен де өздеріңіз сияқты көп пенденің бірімін. Ешкімнен тығылып, ешкімнен қашып жүрген жоқпын. Қандай да бір айтарларыңыз болса, жауабын беруге дайынмын. Бар арманым елімнің дұрыс өмір сүргенін, отанымның гүлденгенін көру ғана. Ешбір топтың алдында тізерлеп кешірім сұрамаймын! Өйткені оған себеп көріп тұрған жоқпын. Әлеуметтік желі шулады екен деп, дірілдейтін қорқақтарың мен емес. Алға қойған нақты мақсатыммен жоспарым бар. Сол жұмыстарды бітіруім керек. Мәжіліс мінберінен халыққа берген антым бар. Берілген мерзім бес жыл. Сол бес жылымды халықтың мүддесін қорғауға арнаймын. Басқасы бір жаратқанның құзырында.

Түсінетін шығарсыздар деп ойлаймын. Ватсабыма шығып, қорқытпақшы болып жатқан батырсымақтар! Сендерден шошып жүретін жағдайым жоқ. Аптасына бес күн жұмысқа жаяу барып, жаяу келемін. Қылатындарыңды қылып алыңдар. Оққағарым да, сендер айтқан «братвам» да жоқ. Сенгенім бір Құдай», - дейді депутат.

Mezgil.kz