Қазақстан мен Түркия бірлесіп, Қазақстан аумағында «Anka» дрондарын құрастыратынын осыған дейін сүйіншілеп, айтқан едік.

Мемлекетаралық келісімдер жасалды. Екі елдің Президенттері Астана мен Анкарада өткен кездесулерде әскери әріптестікті дамыту мәселелеріне бірнеше жолы тоқталып, сөйлеген.

Қазақ-түріктің бірлескен дрон зауыты қашан салынады деген сауал қоғамды көптен талқыда жүрген. Сол сұраққа жауап берілді.

Қазақстанда түріктің «Anka» дрондарын құрастыру келесі жылдан басталуы мүмкін. Бұл туралы «Turkish Aerospace Industries» (TAI)  компанияның ресми өкілі Эррол Оғыз айтты.  

«Біз өндірісті ашып қана қоймай, болашақта Қазақстанның өзі  де, біздің көмегімізсіз, ұшқышсыз аппараттарды өз бетінше шығара алатын болса дейміз. Сол үшін біз тәжірибеміз бен технологиямызды берейік деп отырмыз», - деді Эррол Оғыз.

2022 жылы мамырда түріктің мемлекеттік аэроғарыш компаниясы «Türk Havacılık ve Uzay Sanayii» (TUSAŞ) және «Қазақстан инжиниринг» компаниясы түріктің «Anka» дрондарын Қазақстанда өндіруді қарастыратын әріптестік туралы меморандумға қол қойған.

«Anka» — 2013 жылы «Türk Havacılık ve Uzay Sanayii» компаниясының Түркия қарулы күштеріне арнап шығарған дрондар тобына жатады. Түркияның ресми «Anadolu» агенттігінің ақпаратынша,  биыл жыл соңына дейін бұл дрондар кемінде төрт елдің күштік құрылымдарына тасымалданады.

Осыған дейін Қазақстан әскері түркиялық соққы жасаушы «Anka» дрондарын сынақтан өткізуді бастаған еді. Сынақ 2024 жылдың көктеміне дейін жалғасады.

Сынақ сәтті өткен жағдайда «Anka» дрондары Қазақ армиясының әскери техникаларының қатарын толықтыратын болады.

«Anka» дрондары Таяу Шығыс пен Қарабақ соғысында өзінің қандай күшке қауқары барын көрсеткен.

Оның артықшылық сипаттары: Алыс қашықтыққа ұша алатыны. Соққының дәлдігі мен ұзақ уақыт әуеде бола алатындығы. 300 кг салмақты көтеріп ұшады. Оның тағы бір артықшылығы – мұз қатудан қорғайтын жүйе орнатылған. Бұл төменгі температураларды әуеге көтерулуге мүмкіндік береді.

Mezgil.kz