Қадірлі Қазақ елі! Құрметті Mezgil.kz порталының оқырмандары!

(Сурет: ҚР Орталық коммуникациялар қызметінен алынды)

Бүгін Қазақстанның ең басты күні – Тәуелсіздік күні!

Әлем қазір астаң-кестең, алағай да бұлағай кезеңді бастан кешіруде. Оны күн сайын көріп-біліп жүрміз. Айналамыз ырду-дырду. Қанқасап соғыстар... Ең әуелі елімізді сондай алапаттардан сақта, Құдай!

Тәу етер Тәуелсіздігіміз күн тұрғанша тұрсын! Көк байрағымыз тұғырдан түспесін! Бейбіт күнде сарбаздарымыз саптан, ұлдарымыз аттан, қыздарымыз салттан жығылмасын! Балаларымыз қандықол қанішерлердің қолынан қыршын кетпесін! Әділдік сұраған ата-аналар жазаға жегілмесін! Билігі – елшіл, елі – мемлекетшіл, Тәуелсіздігі – талассыз,  әскері – айбынды, шекарасы – шегелі, жері – егелі ел болуды жазсын, Құдай! Сіздің де, біздің де басты тілек - Ел бүтін болсын!

Алаш жұрты үшін екі дүниеде теңдесі жоқ, атаның қаны, ананың көз-жасымен келген Тәуелсіздік күні құтты болсын!

Асылтекті Алаштың мәңгі жасар ұрпағы! Ұлы даламыздағы ең ұлы мерекеміз – Тәуелсіздік күні ел мен жердің ырысы молайсын!

Тәуелсіздік үшін күрес бір сәтке де тоқтаған емес! Тоқтамайды да! Өйткені, Азаттықтың әр таңы Алаш баласынан қадіріне жетуді, қажет болса, қасық қаны қалғанша қорғауды талап етеді. Тәуелсіздіктің туын тік ұстап, ұрпақтарға аманаттап отыру  исі қазақтың қасиетті парызы екенін әрбір қазақ естен шығармауы тиіс!

Азаттық үшін күрескен азаматтардың рухына мың тағзым!

Ең ұлы мерекеміз - Тәуелсіздік күні құтты болсын!

Ал онадй болса, Алаш азаматтары! Ел-жұртқа, ағайын-туысқа, барша қазағыңызға құтты болсын айтыңыз!

Күншуақтың алдында, ызғардай болған Желтоқсан!

Тас болаттың бұғауын бұзғандай болған Желтоқсан!

 

Суып қалған қанымды қыздырған да Желтоқсан!

Тоған болған ойымды бұздырған да Желтоқсан!

Шөліркеген аптапқа нөсер болған Желтоқсан!

Жанбай қалған шоғыма көсеу болған Желтоқсан!

 

Тебінгінің астынан ала балта суырып, тепсінісіп келгенде...

Тегеурінін қазақтың байрақ еткен Желтоқсан!

Намысым мен рухымды дүйім әлем алдында айғақ еткен Желтоқсан!

Тең атанмен теңессем,Теңдік үшін егессем...

Боздағымды қайратта қайрақ еткен Желтоқсан!

(«Желтоқсан толауынан» алынған үзінділер!)

Mezgil.kz