АҚШ билігі Ресей мен Украина арасындағы ұрыс қимылдарын тоқтату бойынша кедергілерге тап болуда. Трамп әкімшілігі бейбіт келісімді жылдам жасаудан күдер үзе бастаған. Бұл туралы Reuters ақпараттық агенттігі Ақ үйдегі шенеуніктердің пікіріне сілтеме жасай отырып хабарлады. Бейбіт келісімді іске асыру үшін Ақ үй Мәскеу мен Киевке қысым жасау механизмдерін қарастыруда.

 

Трампты президенттік сайлау науқанында ашық қолдаған Fox News арнасының журналисі Джеки Хайнрих Трамптың Владимир Путинге қатысты көзқарасы өзгере бастағанын жазды. «Ақ үй Ресейдің бейбіт келісім жасауға және ұрыс қимылдарын тоқтатуға ниетті еместігін айтып, Мәскеуге қарсы қатаң санкциялар енгізуді ойластыруда» дейді ол.

 

30-наурызда Трамп Путиннің Зеленскийге қатысты сөзін сынға алды. Путин Зеленскийді беделінен айырылған басшы ретінде сипаттап, «Украинада БҰҰ аясында уақытша басқару жүйесін енгізуді ұсынған» болатын. Трамп бұл мәлімдемені «қисынсыз» деді. Ақ үй өз кезегінде Украина билігін заңды деп атады.

 

Трамп сөз арасында былай деді: «Егер біз Украинада ұрыс қимылдарын тоқтату бойынша Ресеймен келісім жасай алмасақ және мен оған Ресей кінәлі екен деп ойласам, олай болмауы да мүмкін, бірақ солай болып қалса, яғни Ресей кінәлі болса, онда мен Ресейдің мұнайына тариф енгіземін. Ресейден шығатын барлық мұнайға тариф енгіземін. Ол қалай жұмыс істейді? Егер сіз Ресейден мұнай сатып алсаңыз, онда АҚШ-пен бизнес жасай алмайтын боласыз деген сөз. Барлық мұнайына 25 пайыз тариф енгіземін. Тариф 25-50 пунктен тұрады».

 

Ақ үйдің баспасөз хатшысы Кэролайн Левитт 1-сәуірде журналистер алдында сөз сөйлеп, Трамптың Путин мен Зеленскийден көңілі қалғанын мәлімдеді. «Президентіміз бұл қақтығысты жылдам аяқтағысы келеді. Қос тараптан да адамдар қырылып жатыр. Бұл тым ұзаққа созылып кетті. Біздің командамыз Украинамен де, Ресеймен де әріптестікті жалғастыруда», - деді ол.

 

АҚШ сенаторлары Кремль бейбіт келісімнен бас тартқан жағдайда Ресейге қарсы енгізілуі мүмкін санкциялар туралы құжатты әзірлеуде. Құжатта Ресейдің мұнайын, газын, уранын және өзге ресурсын сатып алған елдердің тауарына 500 пайыздық тариф енгізу жайлы бастама бар. The Washington Times басылымының жазуынша құжатты республикандық Линдси Грэм мен демократ Ричард Блюменталь әзірлеген. Жалпы құжатқа қос партиядан 50 сенатор қол қойған. Сенаторлар егер Ресей келісімнен бас тартса, онда бұл құжатты қос партия да қолдайтынын айтып, ортақ мәлімдеме жариялады.

Mezgil.kz