Алматылық азамат адам денсаулығына ауыр жарақат келтіргені үшін үш жылға сотталды, деп хабарлайды Вaq.kz ақпарат агенттігі Tengrinews.kz басылымына сілтеме жасап.
«2018 жылдың 28 ақпанында шамамен сағат 10.00-де азамат Х. «Белый Ветер» дүкеніндегі жұмыс орнында И. есімді азаматпен жанжалдасып қалады. Содан соң Х. ас үй пышағын алып, И. есімді азаматты жарақаттайды», - деп хабарлады Алматы қаласы Әуезов аудандық соты.
Соққылардың бірі И. есімді азаматтың ішіне тиеді. Зардап шегушінің денсаулығына ауыр зиян келтіргені үшін сот үкімімен Х. кінәлі деп танылды.
ҚР ҚК 106-бабы 1-бөлігіне сәйкес, Х. енді үш жылға бас бостандығынан айырылды. Үкім заңды күшіне енді.