Жеңіл салмақтағы WBA чемпионы украиналық Василий Ломаченко АҚШ-та иығына ота жасатты.Енді ол шаршы алаңға осы жылдың соңында ғана орала алады. 

 Ота сәтті өтті. Боксшы әйгілі хирург Нейл Эль Альтраченің жеке клиникасында емделді. Ал бұл хирург кезінде Мэнни Пакьяо, Виталий Кличко, Андре Берто сынды боксшыларды аяқтарынан тік тұрғызған. Сондай-ақ, әйгілі баскетболшы Коби Брайант та осы дәрігердің клиенті болған. 
Василий Ломаченко жарақатты 12 мамыр күні венесуэлалық Хорхе Линареске қарсы жекпе-жектің екінші раундында алып қалыпты.

«Иығымның орнынан қозғалып кетіп, қайта қалпына түскенін сездім. Содан оң қолмен жұдырық сермеу қиын болды», – дейді бұл туралы Ломаченконың өзі. 

Эль Алтраченің сөзіне сенсек, Ломаченкоға енді төрт айдай шаршы алаңға шығуға болмайды. Ал жаттығуын қазан айында ғана бастай алады. Осыған байланысты украиналық 25 тамызға жоспарланған келесі жекпе-жегі 8 желтоқсанға шегеріліп отыр.

 Боксшының промоутері Боб Арумның айтуынша, Ломаченконың келесі қарсыласы WBO чемпионы Рэй Белтран болуы тиіс.

Дереккөз: diamondring.kz